1995-ൽ വടക്കാഞ്ചേരി ബ്ലോക്ക് പഞ്ചായത്ത് അംഗമായി ജനസേവന രംഗത്ത് തുടക്കം. പിന്നീട് അസിസ്റ്റന്റ് എൻജിനീയറായി സർക്കാർ സർവീസിൽ പ്രവേശിച്ചു. അസിസ്റ്റന്റ് എക്സിക്യൂട്ടീവ് എൻജിനീയറായി പാലക്കാട് ജില്ലയുടെ ഗ്രാമാന്തരങ്ങളിൽ വികസനമെത്തിക്കാൻ സാധിച്ചു, അഞ്ചുവർഷം ജില്ലാ പഞ്ചായത്തിൽ എക്സിക്യൂട്ടീവ് എൻജിനീയറായും പ്രവർത്തിച്ചിരുന്നു. കൂടാതെ, രണ്ട് വർഷം പാലക്കാട് ജില്ലാ പഞ്ചായത്ത് സെക്രട്ടറിയുടെ അധിക ചുമതല വഹിക്കാനായി.. ഒരു ഉദ്യോഗസ്ഥൻ എന്ന നിലയിലും ജനപ്രതിനിധി എന്ന നിലയിലുമുള്ള എന്റെ അനുഭവസമ്പത്തിനെ കൂടുതൽ കരുത്തുറ്റതാക്കാൻ ഈ സേവന കാലയളവുകള്‍ ഉപകാരപ്പെട്ടിരുന്നു.

തൃശൂർ കടങ്ങോട് സ്വദേശിയായി കെ.എസ്. ചാത്തന്റെയും കെ.കെ. കാളിയുടെയും മകനായാണ് ജനിച്ചത്. എരുമപ്പെട്ടി ഗവൺമെന്റ് ഹൈസ്‌കൂളിലെ പ്രാഥമിക വിദ്യാഭ്യാസത്തിന് ശേഷം തൃശൂർ ഗവൺമെന്റ് എഞ്ചിനീയറിംഗ് കോളേജിൽ നിന്ന് സിവിൽ എഞ്ചിനീയറിങ്ങിൽ ബി-ടെക് ബിരുദം നേടി.

സാമൂഹിക സേവന രംഗത്തെയും ഭരണരംഗത്തെയും മികച്ച ഇടപെടലുകൾക്ക് ലഭിച്ച നിരവധി പുരസ്‌കാരങ്ങൾ എന്റെ കർമ്മപഥത്തിലെ വലിയ കരുത്താണ്. 2014-ലെ മികച്ച എഞ്ചിനീയർ പുരസ്‌കാരവും, ഡോ. അംബേദ്‌കർ നാഷണൽ അവാർഡും ഉൾപ്പെടെയുള്ള അംഗീകാരങ്ങൾ കൂടുതൽ ഉത്തരവാദിത്തത്തോടെ ജനങ്ങൾക്കിടയിൽ പ്രവർത്തിക്കാൻ പ്രചോദനമേകുന്നു.